عتاب الحب

الوفه طبع وكل شخص بيه اوصاف
وهذا اول طبع حسيته وعرفتـــه

وهذا اول درس لليحب معروف
حروفه صعبه هواي لكن حفظتــه

موبس بالمحبة لازم يكــــــون
بكل قضيه تلگاه اذا تعلمتـــــه

قليل الوفه ونادر صــــــــــار
مثل الحلم بالليل والصبح دورته

اذا تظن بيه الوفه ماموجود؟
ليش انته اجيت لگلبي واخترته

ترة ماقصرت وياك فديـــوم
وبكل صراحة انطيتك الردته

موكلشي التريده لازم يصيـــــر
مو كافي احبك ولجرحي صبّرته؟

ظلمتني ومعرفت فد يـــــوم
ينسيني كلامك مرك الضگتــــــه

الناس موبديك بضاعة وانته تختار
ولا كلمن تشوفه بسرعه امنته

اخذ مني نصيحه گبل لا تــــــــــروح
خليك باول درب لان كلشي انته ضيعته

موچنت يمي ابد متخـــــــــــــاف
وصرت بيدك سيف وياما جربته

شجاك تغيرت وتبدلت فدنـــــــــــــوب
موحسيتك بروحي وهمك بالگلب ذوبته


صبرت وياك والصبر يسئلني ليوين؟
گتله لا بعدك صبري ماشفتــــــــــه

مابيعك ولااخليك تذكــــــــــــــار
انته احلى رسم بعيوني رسمته

موبيدي احبك انته ليش تگول
خلينه بعد الوكت مو وكته؟

بعيونك چان واضح كل الكلام
وگلبي جاوب لمن بيهن سئلته

وانا بحبك صرت مفضــــــــوح
شما اضم سرك بعيونك افضحته

بعادك مايحتاج كل توضيح
چنت تحلم انته وغلط فسرته

لا تتحجج بعد وتسوي اعذار
انته براحتك ولوگلبي عذبته

واذا رايد تفارك الله وياك
ضيف انته عليه ومن واجبي اكرمته

مما راق لي